Naedien dat her Warbout lange ghearbeit had mit prediken, mit leren, mit vele maechden te bekieren ende allen gueden een onderstant te wesen, niet alleen bynnen Utrecht mer oec bu- ten als Overijssel ende in Hollant, soe halde hem Got in vreden in ‘t jaer ons Heren M CCCC ende XIII op Sinte-Barnabasa- vent. Na hem koren die susteren tot Sinte-Cecilien enen geheiten meister Jan Galencoep, doctoer in der gothiet. Die regierde vierdehalf jaer ende toech in ’t consilium van Constans. Nae desen koren sij her Johan van Vredendael, die regierde derdehalf jaer. Nae desen regierde her Jan van den Berge iii jaer, luttel min, die naemels regierde die susteren bij den Wijngaert den wij alre lest hielden ende begroven. Hyrnae maecte men een clerchuys dye den susteren een onderstant wesen souden, mit enen rectoer als her Hermen ter Maet, die der susteren bycht hoerde, van