Sepulcrum satis politum, cum epitaphio aureis literis, in nigro marmore ad parietem, spectatur Victoris Scorellii tale [...]. Ad parietem supra cryptam ad partem meridionalem legitur hoc epitaphium: D.O.M. Reverendo et ornatissimo domino Guilielmo ab Asch, huius sacrae aedis canonico et scolastico, Ultraiectinorum ordinum in revisionalibus iudiciis adsessori, ingenio, eloquentia, virtute et prudentia inter sui ordinis primos, litteris, elegantia et lepore multo, viro ad humanitatem et amicitiam facto, testamento denique in pauperes et bibliothecam huius aedis pio, in suos profuso patruo et avunculo optimo, alteri parenti suo, haeredes, ex fratre et sorore nepotes, faciendum curaverunt. In cinerem reverteris. In sarcophago: * Vixit annos LIII, menses III, dies V, obiit V eidus octobris MDCXV.