XVI brieven ende want wi die brieven niet en hebben, soe ried men ons dat wi hen die brieve brengen souden, als wi deden. Mer Got halp ons dat wi se al weder hebben. Alsoe dat men den anderen conventen over grote ghewelden dede dat des gelijc niet veel gehoert en is. Dit regiment der gil- den duerde al die tijt dat di proest elect was, nochtant bedwang hij se te mael zeer op Sunte-Marcusdach. Daernae wertet verdedinct dat di doem- proest avergaff sijn recht biscop David van Borgonyen, Hertoch Philips’ soen, die mit groten volck ende mit groter eren in quam t’ Utrecht. In ’t jaer ons Heren M CCCC LVI opten vi dach in augusto. Welke eyschede sijn willecoem seer scharpeliken dat ons costen omtrint vi Rijnsche gulden ende nochtant gaven sij vel meer die buten woenden. Behalven dit moesten geven gheestelic ende werlic zwaer mergengelt, want men gaff drie jaer lang v witte stuver ende enen ouden braspennync op elken mergen.