Nota, quod mortuo Johanne domicello sine liberis, qui fuit filius comitis Florentii occisi et gener regis Anglie, successit eidem in comitatu Hollandie Johannes, comes Hannoniensis, filius Adelheydis, sororis Wilhelmi, regis Romanorum, qui dedit Guidoni, fratri suo, dominia de Aemstel et de Woerden. Hic comes duxit uxorem Philippam, filiam comitis Lutemburgie. De qua genuit Johannem primogenitum, Wilhelmum succedentem sibi, Johannem de Bellomonte, dominum Heinricum, canonicum Cameracensem, Walravenum, domicellum, Johannam, abbatissam Fortanalacensem, Margretam, comitissam Atrebatensem, Adelheydim, comitissam Claromontensem, Mariam, comitissam de Borbonoys, et Machteldim, dominam de Nyele. Hic comes devicit Johannem de Renes, qui fugit ad Aelbertum, regem Romanorum. Qui voluit Hollandiam tamquam feodum imperii incorporare Romano imperio, sed non potuit. Ymmo, qui fugiendo potestatem dicti Johannis comitis retrocessit ad Craneburgiam, et post ad Austriam et pro honore regis archiepiscopus Coloniensis fecit pacem. Sed dictus Johannes de Renes proscriptus cum suis Zelandrinis fugit ad Flandriam, sed bona eorum Johannes comes suis coadjutoribus subdivisit. Postea multa prelia fuerunt inter Hollandiam et Flandriam in Wallacria. Flandrenses succubuerunt in Caedzant, quineciam in Veer et in Arrmuden uno die bis succubuit pars Flandrensium. Hic Johannes comes quinque [annos] ontbreekt in handschrift. strennue rexit Hollandiam. Et obiit et cum Philippa uxore sua Valenchenis honorifice tumulatus est.