silvers, ende in de omleggende steeden was het noch veel duerder. De menschen vergaderden op veel plaetsen gras saet dat men zway heet, ende maecten daer broot aff. In ’t convent, daer noch geen provisie was, de susteren eeten gerst ende haver onder malcanderen. Anno 1438 werden de susteren scielick besieckt, sulck als het een crech, volchden terstont 8 ofte 9 ter neder vallende, hoewel dat se van elcander gescheijden waren, dickwils daech, somtijts voor doot leggende, somtijts nockende dat men meende sij mosten versticken. Also dat geen doctoren daeraff wisten te oordelen, waerdoor veel bij haer vrinden gingen, vreesende daermeede ge- quelt te worden; dan daer storff niemant, hoewel dselve siecte in de stadt veel menschen meede nam. Anno 1440 was broer Willem Aertsen van Montfoort, simpel, oprecht, devotich, die sonder een verveerlicke scricking geen vrouwen mocht sien die oneerlick waren. Dit was een broeder van de derde oirde te Vreendael, daer hij bij bleef, ende wilde niet aennemen de oirde der reguliers met de andere. Ende is nae sommige tijt tot Geijn gecomen, daer hij corts sterft ende wert begraven op ’t kerckhoff, daer de pater meende een kerck te bouwen. Eodem anno bracht Weyn van Oostrum meede het lant genaemt het Smeer, daer het convent tevoren maer een vieren- deel aff hadde. Ende den pater cocht noch van Dirc van Zuylen het lant Cuyl, v mergen groot, noch van joffrou Alijt van Rijswijck een stuck lants genaemt Vlayck, met Roestlant, Goutcamp, ende Proutscamp. Anno 1441 een eedele weduwe, geboren uyt Walcheren, genaemt Catarina Hugen, stervende tot Oudewater, wert tot Geyn begraven, ende liet den clooster over den iic noblen.