NL-UtHUA_A100819_000205.jpg
ende noch een ander daer te brachte. Dies hij een vroegen crijgende, socht haer aen een out we- duenaer te hylicken. Maer sij en begeerde geen out man, dan wilde liever in een clooster gaen. Des hij haer tot Geijn een plaetse verworf met beijde haer dochteren, ende cochte seeckere renten op beijde haer lijven. Janna leefde noch anno 1573 , 99 jaeren out, ende leijt in Sinte-Annen- clooster binnen Utrecht. Anno 1495 gaff Simon Wonder ende Mechtelt sijn wijff een karsuvel ende een vergulden kelck, met noch 200 gulden.Anno 1496 brack de Leck bij de Vaert in tot grote scade op Aschwoensdach. Anno 1499 ontseijde den hertoge van Cleve die van Utrecht ende nam Renen in. Eodem [anno] sterft pater Alewijn ende quam in sijn plaetse heer Willem Wyerssen. Anno 1500 quam in ’t clooster een rijcke weduwe Tacxs van Basin ende was 62 jaeren out, ende begeerde nonne te worden. Ende sij gaff den convent soo lange sij leefde 230 gulden, met noch een testament van 500 gulden. Eodem anno resigneerde de priorinne haer offitie, ende suster Sophie Jans quam in haer plaetse, die haer niet wel tracteerde. Ende Willemken sterft jaers daeraen. Anno 1501 coft het convent van Evert van Essen een huys ende steenen camer an Geynbrugge op den thins van xi botgens; het lant Quakernaeck over Leck is gecomen van suster Janne Anthonis Wolfartsdochter. Anno 1515 wort de kerck in ’t Geyn vermaect onder suster Sophia Jans van Hove. Costen: 2200 gulden. Anno 1518 sterft pater Willem Wyerssen.