NL-UtHUA_A100819_000204.jpg
steert , daer Pelgrim van Hoeij toe gaff hondert gulden, ende een rente uyt Grauwerts hofstede, dat men nu den Blaesbalch noempt, noch 12 schellingen uyt een hofstede die Tyman van Oostrum plach te sijn, elcken schellinge voor een out butgen gerekent. Anno 1477 gaff heer Jan van Dorle een stuck lants. Eodem [anno] sterft heer Hendrick Dry pater, die het convent liet 240 Rijnsgulden, daermede getimmert worde het pant, daer Harman van Mekeren oock toe gaff. Ende heer Jacob van Goch wort pater gemaect. Margriet Holle sterft een jaer daernae ende Willemgen van Cleeff wert de 2 priorinne. Doen ter tijt om der oorlogen wille leeden sij over de 2000 gulden scaden in twe jaeren. Ende het was duren tijt, sulcx dat een mud weijt 4 gulden goude, een mud rogge 3, ende wat boteren 20 gulden.Heer Jacob van Goch sterft anno 1480 , het convent was lange sonder pater. Ende procuratrix met 6 oude susteren woonden binnen Isselstein, in ’t huys van Aelbert Meerenstein. Anno 1485 wert heer Aluwyn Simonssen, regulier tot Steyn bij der Goude, pater. Dese om sijn convent te ontlasten, vercocht den Duvestert aen Hendrick van Wijck. Anno 1489 quam in ’t convent Mechtelt Gerrit van Roden dochter met beijde haere kijnderen, Jan[na] ende Agniet van Oirt, die sij beijde hadde bij meester Elias van Oordt, canonic Sinte-Marien ’t Utrecht. Sij was een simpel kijnt, niet arch. Daromme als sij te biechte soude gaen, vraechde heer Elias haer off sij oeck biechte dat se somtijts bij hem sliep, seijde sij: 'Neen ick heer, maer ist sonde, so sal ickx doen'. Ende als hij seijde dattet sonde was, seijde sij dattet vreempt was dat hij, soo geleert sijnde, sonde dede