Beatrix van Dordrecht
een godvruchtige weduwe die het reedelicken hadde, Aertgen Buijs genaemt, deese tot behulp nemende een rijcke devote meecht, meede aldaer wonende, Beatrix van Dordrecht genaemt, heeft de 3 susteren in haer huys genomen ende een tijt lanck van haer beijder goet gealimenteert. Ende begonsten met hem vijven in ’t gemeen te leven, recht off sij in een clooster hadden ge- woont. Ende naedat alle dijcken bijnaer in Hollant, Zeelant, Vrieslant deur waren gebroocken op Sinte-Elisabethnacht ende den dijck tusschen Sint-Geertruydenberch ende Dordrecht soo grotelicx was geschuert ende gebroken datter 72 dorpen bleven verdroncken, onder welcke dat Almkerck meede gerekent wert, alwaer dese 3 susteren een convent plachten te hebben met veel schoon coornlants, soo en hebben sij voorts geen hoope gehadt om haer convent weder te crijgen. Daeromme Beatrix, die dit clooster wel hadde gekent ende van meenige was in devotie ende eenicheijt Godt te dienen, alsoo sij naeder werelt rijck was, horende dat een convent getimmert was bij Issel- Stein, dat heer Aernt van Egmont ende Isselstein anno 1394 aldaer buyten de poorten gefondeert hadde, is derwaerts gereijst om oock een plaetse te verkiesen, daer sij God in rusten soude mogen dienen. Ende als de plaetse in ’t Gheijn haer wel aenstont om des kercks wil, daer noch een pastory was, heeft gevraecht daernae een huys, ende heeft een gevonden op den ouden dijck staende, daer eertijts de Lecke plach bij te loopen. Ende dat gecocht ende affgebroken sijnde, heeft het naerder de kerck doen stellen mit consent des pastoors ende buyren, ende dit was wel 70 voeten lanck. Twelck als sij hadde laten onder- scheijden met horden, in forme van cellekens, is daerin gaen wonen met de drie voorscreven susterkens. Van dewelcke de oudste was ge- naempt Dieu die sij stelde als procuraetster, ende d’ander Jan Aertsdochter van Baeck ende de derde Lijsbet van Giffen. Maer Buijs bleeff binnen Utrecht ende was dese susteren seer toe- gedaen, ende bestelde haer al dat sij van node had- den. Doch sterft corts daernae anno 1429 , alle haer goet de susteren latende. Als dan Beatrix Jacobsdochter oock hadde een geestelick habijt aenge- togen ende, tselfde siende, een dochter van Isselstein, Geertruyt Marten Breyls dochter heeft meede versocht ontfangen te worden, des sijn sij vijff sterck geweest. Waernae suster Hadwich mater van Almkerck, in groote armoede sijnde, die uyt het clooster van Onser Vrouwe tot Amsterdam daer gebrocht was; dese heeft met haer gebracht: suster Lutgard Jansdochter, suster Lijsbet Gerrit van Ganswijck dochter, Margriet Rutger van Wiels dochter, suster Heyltgen Jacobsdochter, suster Claertgen Gerritsdochter van Geertrudenberch, Beatrix Jan Borchgreven dochter van Almkerck. Ende die daer latende, is gereijst naer Utrecht, ende haestelick weder comende heeft meede gebracht een slemighe suster van Sint-Nicolas binnen Utrecht, Geertruyt. In wiens presentie sij de susteren, 12 in ’t getalle, vermaent heeft tot eendracht, ende dat haer nodich was een overste te verkiesen uyt haer diese naest Godt souden gehoorsamen, ende is soo weder nae Amsterdam tot haer oude clooster gegaen. Ende dese susteren hebben eerst versocht Beatrix tot mater, die dat weijgerde. Ende soo Dieu daernae trachtede, de ver- maninge haer oude maters vergeten hebbende, is ten lesten eendrachtelicken suster Geertruyt van Sint-Nicolas gecosen, met consente van haer mater binnen Utrecht. Waerdoor Dieu, gefrustreert sijnde, heeft het clooster verlaten ende is in de werelt gegaen, daer sij oock gestorven is. Anno 1423 heeft de mater van Sinte-Cecilien binnen Utrecht met hulpe van eenige rijcke hoeren susteren gesticht een convent binnen Utrecht. Ende omdat dees conventen waren van eender oirde als van de derde oirden Sint-Francois, soo hebben sij grotelicx ge- arbeijt om de oirde te vermeeren. Ende de mater van Sinte-Cecilien voornoemt, geweest sijnde een rijcke weduwe die wel cost regieren, heeft dit clooster, Bethlem genaemt, slechtelicken opgetimmert; hebbende, daer mater geworden ende haer oude verlaten, ver- cregen tot haer nieu clooster confirmatie
subject
Beatrix van Dordrecht
label
Beatrix van Dordrecht