Alwin Simonszn., regulier te Stein bij Gouda
Heer Jacob van Goch sterft anno 1480 , het convent was lange sonder pater. Ende procuratrix met 6 oude susteren woonden binnen Isselstein, in ’t huys van Aelbert Meerenstein. Anno 1485 wert heer Aluwyn Simonssen, regulier tot Steyn bij der Goude, pater. Dese om sijn convent te ontlasten, vercocht den Duvestert aen Hendrick van Wijck. Anno 1489 quam in ’t convent Mechtelt Gerrit van Roden dochter met beijde haere kijnderen, Jan[na] ende Agniet van Oirt, die sij beijde hadde bij meester Elias van Oordt, canonic Sinte-Marien ’t Utrecht. Sij was een simpel kijnt, niet arch. Daromme als sij te biechte soude gaen, vraechde heer Elias haer off sij oeck biechte dat se somtijts bij hem sliep, seijde sij: 'Neen ick heer, maer ist sonde, so sal ickx doen'. Ende als hij seijde dattet sonde was, seijde sij dattet vreempt was dat hij, soo geleert sijnde, sonde dedeAnno 1496 brack de Leck bij de Vaert in tot grote scade op Aschwoensdach. Anno 1499 ontseijde den hertoge van Cleve die van Utrecht ende nam Renen in. Eodem [anno] sterft pater Alewijn ende quam in sijn plaetse heer Willem Wyerssen. Anno 1500 quam in ’t clooster een rijcke weduwe Tacxs van Basin ende was 62 jaeren out, ende begeerde nonne te worden. Ende sij gaff den convent soo lange sij leefde 230 gulden, met noch een testament van 500 gulden. Eodem anno resigneerde de priorinne haer offitie, ende suster Sophie Jans quam in haer plaetse, die haer niet wel tracteerde. Ende Willemken sterft jaers daeraen. Anno 1501 coft het convent van Evert van Essen een huys ende steenen camer an Geynbrugge op den thins van xi botgens; het lant Quakernaeck over Leck is gecomen van suster Janne Anthonis Wolfartsdochter. Anno 1515 wort de kerck in ’t Geyn vermaect onder suster Sophia Jans van Hove. Costen: 2200 gulden. Anno 1518 sterft pater Willem Wyerssen.
subject
Alwin Simonszn., regulier te Stein bij Gouda
label
Alwin Simonszn., regulier te Stein bij Gouda