Begeerende in memorie te stellen ende te verha- len den oorspronck des convents, gelegen buyten Utrecht, tusschen de Vaert ende Yselstein, genaemt Nazareth, getimmert ende gefundeert in de gedestrueerde stadt van Gheijn, naedat de- selve ontrent 100 jaeren van tevooren ge- destrueert was. Dat niet sijn begin genomen heeft van den geenen die een coninck ende prins is over alle kijnderen des hoveerdicheijts, maer den geenen die als hij rijck was om onser salicheijts wille arm is geworden, opdat hij ons al tesamen door sijn armoij rijck soude maken etcetera. Want soo lange de cloosters de werelt tot een spiegel sijn geweest ende een exempel van liefde, onderdanicheijt ende eendracht, soo sal de werelt den selven geen gebreck laten lijden, God den menschen daertoe verwec- kende, etcetera. Anno 1423 , Martino de V papa ende heer Vrederick van Blanckenheim bischop tot Utrecht sijnde, sijn gecomen binnen Utrecht drie susteren uyt het dorp Almkerck, gelegen in ’t lant van Altenae, bij Woudrichem. Ende daer woonde op de selve tijt binnen Utrechteen godvruchtige weduwe die het reedelicken hadde, Aertgen Buijs genaemt, deese tot behulp nemende een rijcke devote meecht, meede aldaer wonende, Beatrix van Dordrecht genaemt, heeft de 3 susteren in haer huys genomen ende een tijt lanck van haer beijder goet gealimenteert. Ende begonsten met hem vijven in ’t gemeen te leven, recht off sij in een clooster hadden ge- woont. Ende naedat alle dijcken bijnaer in Hollant, Zeelant, Vrieslant deur waren gebroocken op Sinte-Elisabethnacht ende den dijck tusschen Sint-Geertruydenberch ende Dordrecht soo grotelicx was geschuert ende gebroken datter 72 dorpen bleven verdroncken, onder welcke dat Almkerck meede gerekent wert, alwaer dese 3 susteren een convent plachten te hebben met veel schoon coornlants, soo en hebben sij voorts geen hoope gehadt om haer convent weder te crijgen. Daeromme Beatrix, die dit clooster wel hadde gekent ende van meenige was in devotie ende eenicheijt Godt te dienen, alsoo sij naeder werelt rijck was, horende dat een convent getimmert was bij Issel- Stein, dat heer Aernt van Egmont ende Isselstein anno 1394 aldaer buyten de poorten gefondeert hadde, is derwaerts gereijst om oock een plaetse te verkiesen, daer sij God in rusten soude mogen dienen. Ende als de plaetse in ’t Gheijn haer wel aenstont om des kercks wil, daer noch een pastory was, heeft gevraecht daernae een